انهارده حصل موقف غريب جدا معايا ومحرج في نفس الوقت
صحيت من النوم لقيت أمي بتكلمني بتقولي ابونا سايبلك شنطة فيها زيت وسكر ولحمة ومكرونه توديها لفولان
انسحبت من لساني وقولتلها بس فولان مش محتاج ,, كان يديها لحد تاني
قالتلي ده وزع علي كل الناس وجابلنا شنطة وانت ليك شنطه
قولتلها طيب حاضر
المهم وانا رايح اديهاله لقيتها بتقولي خد شنطة الزباله معاك .. انا حطهالك في البيت من تحت
الغريب ان شنطة الزباله نفس حجم ولون الشنطة اللي فيها العطية
المهم وصلت للراجل وخبطت عليه وقولتله ابونا باعتلك الشنطة دي
قالي فيها ايه ؟ قولتله مواد تموينيه
راح قال هو ده يارب اللي قدرت عليه ؟؟ بقولك داخل مشروع كبير مع ناس ومحتاج فلوس وطالب الفرج من عندك , تقوم باعتلي شنطة فيها زيت وسكر
المهم سبتهاله ورحت رميت الزباله وروحت
الغريب ان بعدها بساعه لقيت ابونا بيكلمني بيقولي الراجل جالي الكنيسة وبيزعق وبيقولي انتوا بتستهزئوا بيا ؟؟ انا اصلا مش محتاج لعطيتكم .. وصلت بيكم الإستهزاء انكم تبعتولي شنطة زباله ؟؟
قولتله اكيد يا ابونا حصل لبس ,, اديني ربع ساعه وهصلح الموقف
جريت بسرعه علي صندوق الزباله اجيب منه الشنطة اللي اترمت بالغلط
لقيت راجل غلبان جدا وهدومة بسيطة ومتقطعه عمال يقلب في الحاجات اللي في الشنطة وببيقول شكرا يارب
اتكسفت جدا اخدها منه ,, جريت علي ابونا وبالصدفة كان الراجل الغضبان قاعد معاه في المكتب وحكيتلهم الموقف ،
ساعتها الراجل ابتسم وقال .. شكرا يارب علي الرساله وفعلا كفاية اللي عندي ,, واستأذن ومشي
ساعتها ايقنت تماماً وعرفت معنى كلمة " شكرا يارب "
شكرا يارب علي المرض
شكرا يارب علي الإحتياج
شكرا يارب علي كل حاجه بتبعتها ..
شكرا على القليل قبل الكتير ،،
#شكرا_يارب
لـ مايكل سامي
ليست هناك تعليقات:
إرسال تعليق